DOES JESUS CARE?

LAL ISUAN MIN NGAIHSAK NGAI EM?
(Lungngaih ni leh lawm lai niah hian)
KHB. No. 154 na a mi, hla ropui tak mai hi F.E. Graeff (1860-1919) a phuah ni in,
J. Linclon Hall (186-1930) - an  a thluk a siam a ni a,He hla lungkuai tak mai, buaina leh harsat mangan nia mite thinlung chhun keh fotu hi kan hre lar hlawm viau awm e.

A phuahtu Franklin Ellsworth Graeff chanchin atang hian he hla pian chhan hi a awm kan tihpui ngei ang a, a tawrh ang tuara lungngai mangang thinten hetiang hla kan chhamchhuah ve theih loh laia min hnema min tichak fotu hla tha tak min hnutchhiah hi a ropuiin a lawmawm takzet a ni.

Graeff hi Philadelphia-a Methodist kohhran zirtirtu lar tak a ni a, kum 1890 vel kha a vanglai a ni awm e. Philadelphia Methodist ho zingah mi langsar leh ropui ber ni lo mahse naupangho a zirtir dan kalhmang khunkhan tha tak chuan mite a hneh fo thin. Pathian fakna hla 200 aia tam a phuah a, poetry te, Pathian thu lam article te a ziak nasa hle a, novel lar tak, 'The Minister's Twin' tih pawh a ziak bawk.

Engtiang taka hreawm nge a tawrha hetiang hla, tunlai khawvela lar leh sak hlawh em em a lo phuah chhuah mai le? Kum 33 a nihin nupui, Mary Laurene Mauger a nei a, 1900 US census record-a a landanin fa an nei lo va, a nupui chanchin pawh hi hriat tur a tam lo hle niin a lang. Heti chung hian thenkhat chuan a nupui leh a fate chu meiah an kang hlum a ni an ti a, Elliot chuan midang tuemaw chanchin an ngaihpawlh leh sawichhawn niin a ngai thung.Mitthi vui leh inneih nikhuaa mite thlamuanna thu hrilh thintu chuan a nuna a thiltawn avang chuan thlamuantu a ngai ve tho mai.

Graeff chu lungngaih manganna laka fihlim a ni bik lo va, 1880 khan a farnu upa ber Ann chuan a boralsan a, 1882 khan a farnu naupang zawk Sallie chu a boral veleh a, (a farnu zinga Emmeline chu a pian hmain a boral thung). Chutia a farnute a chan mek lai chuan a kum zawnin a nu leh pate an boral chhunzawm a. A nu Matilda Zerbe Graeff chu 3 Sept.1886 khan a boral a, a pa, Samuel Beard Graeff chu a kum leh 25 March 1887 chuan a boral veleh ta. A farnu naupang ber nen chuan an awm dun ta ran mai a. Thihna nunrawng thlazar hnuaia a nun khawhar tak a ziaawm chho dawn ta maw tih mek laiin lungngaihna leh manganna a tawmpui, a inhnemna awmchhun a farnu naupang ber Arasma Graeff Oliver chu Feb. 14, 1901 khan a boral veleh ta a ni. Graeff chu kum 40 mi vel a ni tawh a, a chhungten an boralsan zo ta! Chuti chung chuan,
"Aw, min ngaihsak tih ka hria,
Ka lungngaihin a tina;
Ngui chang ni leh zankhua rei hlauhawm hnuaiah,Min ngaihsak tih ka hria'
a la rawn ti chhuak thei nia mawle!

Thihna kut vawtin a chhungte zawng zawng a laksak hi a tuar na lo bik a ni lo va, "Leia lungduh ber ka then laiin,
Lal Isuan min ngaihsak ngai em?
Tuar rual loh lungchhia, thinlai min run hi,A hriain a ngainep ang em?
a rawn tichhuak ve lo thei lo a ni.

He hla kan sak lai hian Graeff-a nun tawmpui chungin, ‘ Ka Pathian, ka Pathian, engah nge mi kalsan?’, (Mat.27:46) ti chungin sa thin mah ila, 'Anin a ngaihsak thin che u avangin in manganna zawng zawng ama chungah nghat vek rawh u'. (1 Pet.5:7) tih behchhana he hla thunawn (kan tarlan hmasak) hian rinna kawnga a ngelnghehzia a nemnghet a, a rin Isua a van hrechiang em! A hunlaia 'sunshine minister' ti hiala an koh chu a phu hle a lo a ni.

Pathianin Petera hnena, ‘Nimahsela i rin a bo loh nan ka tawngtaisak che a ni; i hawi kir leh hunah nangin i unaute tinghet ang che’, (Luka 22:32) a lo tih ang khan Graeff pawh hian tunthlengin ringtute nun khalh ngiltu leh rintlak Pathian kan nei a ni tih hi he hla hmang hian min hriat nawntir fova. ‘ I rit phurh chu LALPA chungah nghat la, tichuan anin a tichak ang che; Mi fel chu engtikah mah tihnghin a phal lo vang,’ (Sam 55:22) Graeff-an he hla a phuah laia zawhna a siam, a hla chang tina a dah, ‘Aw ka nunna, engah nge i kun reng? Engah nge ka chhungah hian i buai ni?,’ (Sam 43:5) tih hi a hla thunawn hian a rawn lehthaltir a, a rawn chhang fithla leh vek a ni. ‘A ram leh a felna chu zawng hmasa zawk rawh u, tichuan chung zawng zawng chu a pek belhchhah dawn che u nia,’ (Mat.6:33).

He hla thluk siamtu Joseph Lincoln Hall (186-1930) hian khatih hunlaia ‘sentimental ballads’ an tih zulzuiin a siam a, phur taka sak chi a ni lo va, a chang-ah lungkuai zawnga sak theih turin solfa-a a octave hniam lam a dah a, loh theih lohva tlema invawrh hlek chu awm bawk mah se, hei hian he hla thuin a tum a phawkchhuak tha hle a ni an ti a, chutih rual chuan a thunawn hi he hla thluk mawina belhchhahtu leh a chang kan sak laia ngaihtuahna ril tak kan hman lai (a mood-a kan chen lai), lung kuai taka zawhnain min chenchilh laia min chawikang lehtu, a thu mil tak, a changa zawhna chhanna kan dawn min hrilhfiahtu, Pathian hlutzia amah ring chunga puanchhuahna a nih anga a tlema a octave sang lam a rawn hmang chho leh hian Hall-a music thiamzia a tilang chiang em em a ni an ti bawk.
Mizo tawnga a hla thu zawng zawng chu tarlang lo mai ila, Mizo tawnga letlingtu, Rev. P.D. Sena (1901-1974)-an a lehlin thiamzia kan hriat theihnan a saptawng hi dah zawk ila a tha ang e.

Heng Bible chang te han bih zui bawk i la.. A ropui teh a sin!!!! 1 Peter 5:7; Sam 55:22; Sam 43:5: Mat. 6:33

⛵⛵⛵⛵⛵⛵⛵⛵
Does Jesus Care?
1.Does Jesus care when my heart is pained
Too deeply for mirth or song,
As the burdens press, and the cares distress
And the way grows weary and long?
Refrain :
Oh yes, He cares, I know He cares,
His heart is touched with my grief;
When the days are weary, the long nights dreary,
I know my Savior cares.
2. Does Jesus care when my way is dark
With a nameless dread and fear?
As the daylight fades into deep night shades,
Does He care enough to be near?
3. Does Jesus care when I’ve tried and failed
To resist some temptation strong;
When for my deep grief there is no relief,
Though my tears flow all the night long?
4. Does Jesus care when I’ve said “goodbye”
To the dearest on earth to me,
And my sad heart aches till it nearly breaks,
Is it aught to Him? Does He see?