THATCHHE PALAI

Lumen zan khan, zan tir lamah mitthi chhungte zinga mi hi ka bulah a thu a, a hawi a hawi a.

"Khawnge Englova hi? Whatsapp-ah ka pa a ui thu a rawn ziak kur nguai sia, amah hi ka la hmu miah lo." a ti!

    Tum khat chu, Aizawl chhuah lam, veng lian taka an branch president nen kan thu dun a.

A phone a en nuap nuap a, "chhiat tawh thute hi kan han post ve bawk a, RIP tiin an rawn reply sup sup a, khawhar inah hmuh tur an awm leh der si lo. Zaninah ka sawi chhuak dawn.." a ti.

   Mahni in lum atanga hawihhawm te, lusun hnem te, tawrhpui te, fuih te, thurawn pek te, ngaihdan sawi te, vui leh vaina thusawite hi a awlsam ta hle mai.

A hmanrua a awm chuan kan lo tawng duh bawrh bawrh hlawm e. Happy birthday chumi khami...a tlar thla tuar zel a nih hi.

     Politician ho hi an hmuiphun leh an mitmeng a inang lo an ti fiamthu thin a. Kan thu thawn leh kan rilru hi hriathran hleihtheih a ni ta mang hauh lo. RIP thawntu hian khawhar in a thleng zo lo a. Birthday wish-tu hian thawn theih a nih vangin a thawn satliah ve mai mai. Rawn reply lo mahse eng ualah a ngai chuang lo.

"Ne tih, nai ltk che" rawn ti reng se, rawn leng chuang si lo se. Tlai leh puar takin awm rawh ti a, a tisa mamawh phuhruk chuan si loh nen tul khata thil tawk vel a ni.

   Hetiang hi kan duhtawk a nih chuan, khawhar chhungte hnenah hian Routmawii khawhar hlate hi thawn mai ila. "Kha, ka rawn kal hman si lo, hei hi lo play mai teh u..." ti mai zel ila a hahdam khawp ang chu!

   Kan hman loh chhuanlam siamna thu leh hlate hi loan hmuhna tham khawpa pawmawm hi a ni vek mai, phat master, phat specialist, veng khat nula hmeltha biak tluk theihna khawpa mam tha leh pawm naawm a ni vek mai.

Kan duh ber theuh erawh chu a tak ngeia rawn thleng, a nak ngeia zentute hi an ni.

   Kohhranin hnatlang a ko a, YMA in hnatlang a ko a, kan hnatlang hman lo a nih chuan, hnatlangte hmuh kan hreh em em  thin kha a ni ngai.

Tunah chuan kohhran leh YMA in hnatlang a koh mek lai pawhin inkhel turin kan inakchhuak luah luah a, kan lo inkhel awrh awrh a, hnatlang kan thlir veuh veuh tawh mai a nih hi!

    Thiante mitthi lumena rim taka an awm laiin mahni in lumah, rizai inthawlh kuk chungin mobile phone kan khal zankhua thei.

Veng hla deuha thil thleng kan hriat ran theih tehlul nen, vengchhunga mitthi awm thu, veng ral lehlam khawk ruih ruih khawpa an aute chu kan han hre lo leh tlat a!

   Gas a awm an tih chuan laklawh nei map lovin kan tek chhuak nghal a, mitthi an puan chuan kan laklawh ta bik tlat a, kan thenawm maiah mitthi an awm a, midang pawh zah zo lovin an tap rawih rawih a. Zan khat tlaivarpui, zan thum va lenpui kan han hman ngang lo thinte hi, eng ang mihring nge maw kan nih le! A zawng a za chu kan hman lo pawh a ni thei, vawi khat mah lang reng reng lova kan han awm theite hi, bible-in hun hnuhnunga thil lo thleng tur a sawi zinga 'hmangaihna pianpui reng reng lote'kha kan ni hlawm ta zawk em ni ?

   Mizote hi keini aia vanduai zawkte pui tura penchhuak thin kan ni a. A nawm leh a nawm loh lam ni lovin, a tul vanga pen chhuak thin kan ni ngai e?