'WAKE ME UP WHEN SEPTEMBER ENDS'

(September thla a ral hnuah chauh min kai harh dawn nia) — Green Day
`
Kumtin September thla a lo thlen apiangin khawvel hmun hrang hranga thalaite zingah hla pakhat a lar thin a, chu hla chu engdang ni lovin Green Day hla"Wake me up when September ends" tih hi a ni.
`
Oakland, California-a nupa Andrew Amrstrong leh Ollie Jackson te chuan an fa paruk na’n mipa neiin a hmingah an chhungkaw hming chawiinBillie Joe Armstrong an sa a. Andrew hi Safety Inc. – truck driver niin nitin deuhthaw a motor lian tak chu a khalh chhuak thin a. A remchang a nih phawt chuan an fa naupang ber, mipa naupang harh tak Billie Joe Armstrong chuan a zui thin. Joe hi naupang harh danglam tih takah a chang chuan a pa motor khalh lai gear chu a thlak thut a, a chang leh a horn te tul lo takin a lo pe thul. A mut a chhuah leh truck-ah chuan a pa ban nghengin a muhil leh mai a. An inkawm ngeih em em a, ‘Thianpa’ tiin an inko mai thin.
Chhungkaw hlim tak nia hun an hman mek laiin chhungkaw pa ber Andrew chuan Hrawk Cancer a vei ta a, Joe chu a pa bulah a awm chawt a, rei tak a kalsan ngai lo, tihtheih erawh a nei tlem hle. An inenkawl ngial hnuah pawh mihring thiamna leh theihna hmanga chhanchhuah rual a ni ta lo va, kum 1982, September ni 10 ni chuan khawvela kir leh ngai tawh lo turin piallei thuahriat hnuaiah an zalh a ngai ta.
`
An lawina kohhran Pastor-in khunkhan takin a vuina hun a hmang a, inhnit feih feih thawm tih loh chu thawm dang hriat tur a awm lo. Joe pawh mittui tla perin a tel ve a, a pa a thianpa ni bawk kuang chu a en reng a, a insum zo ta lo; thawklehkhatah ring mangkhenin a rawn tap chhuak thut a, tumah ngaichang lovin in lam panin a tlan haw nghal nal nal a, a room-ah a inkalhkhum a, a nu Ollie mangang chuan kawngka hawng turin a ngen chiam a, mahse, Joe chuan a hawng duh lo. Lungngaihna chhum dum chhah takin a chimpil thla; September thla chu kalhlen a duh a, a nu-in chhanna a hmuh chhun pawh, “ September thla ral hnuah min kai harh chauh dawn nia” tih chu a ni.
`
Summer has come and passed
The innocent can never last
Wake me up when September ends
Like my father come to pass
Seven years has gone so fast
Wake me up when September ends
`
A innghahna a pa, a chhuan em em; khawvela pa ropui ber leh thil tithei ber ni a a hriatin a han thihsan atang chuan amahin khawvel a hmachhawn a ngai ta a, a pa nena awlsam taka harsatna an paltlang thin chu a mah ngawt chuan paltlang harsa a ti thin. A thil thiam leh chhuan tur neih apiang a hrilh leh a hmuh tir thinin a awmlohsanna chu rei tawh mahse, a theihnghilh thei lova;a pa chu a rilruah lo tharin van ata ruahpui surin thil a nan huh ang maiin mipa biangah mittui a lo luang a, a hmai chu a bual huh leh thin.
`
Here comes the rain again
Falling from the stars
Drenched in my paint again
Becoming who we are
As my memory rests
But never forget what I’ve lost
Wake me up when September ends
`
Thlasik vin tak liamin nipui a lo thaw a, an awmna phul hmun chamdiaiah chuan pangpar chi tin reng a rawn vul a, chung pangpar te chu khuai leh phengphehlep ten an bawm a, sava chi tinreng an chiar noh noh a. Chu nipui lo thleng lawmna’n chuan chung phul hmunah te chuan dar an vaw thin a, chu dar ri chu hlim au thawmin a pawlh thin. Joe te chhungkua hi a phur berah an tang thin a, dar vuak hmasak inchuhin an unau an innek a; an au chel chul bawk a, a pa chuan, “In nau Joe kha vuak hmasak tir rawh u” tiin thupek a han chhuah a, Joe chu a vaw hmasatuah a tang leh nge nge thin. Mahse, a pa awm loh hnuah erawh engkim a chuai a, nipui lo thleng chuan dar vuaka lawm a hlawh zo tawh lo va, dar pawhin hlutna a nei tawh hek lo...
`
Ring out the bells again
Like we did when spring began
Wake me up when September ends
Like my father come to pass
Twenty years has gone so fast
Wake me up when September ends
`
Joe te hian a pa thih hnu kum 7 ralah a thianpa Mike Dirnt nen Sweet Children an din a, a hnuah he band hi tun thleng kan hriat lar Green Day tiin a hming an thlak a. A pa sunna hla hi a pa thih atanga kum 20 –naah a phuah ve chauh a ni. Tuna kan sawi mek"Wake me up when September ends" tih hla hi kum 2002-a Green Day Album tihchhuah ‘ Shenanigans’-ah khan telh tum a ni nain Joe hian a sak dawn apiangin a mitthlaah a pa a hmu thin a, a thianten nalh ti viau mahse a sak hleihtheih tak loh avangin kum 2005-a an tihchhuah ‘American Idiot’ Album–ah an telh ta chauh a ni.